(公視新聞網 / 林思皓 謝季潾）紅彩帶共搝開，幾若粒雞胿仔飛出來，慶祝臺灣佮日本教育交流二十冬。教育部舉辦紀念展覽，民眾通透過VR目鏡，袂輸親身來到日本的學校。三十開幕式，部長潘文忠特別講著今年雙十來臺表演、予全國人民印象足深的京都橘高校。

教育部長 潘文忠表示：「in來毋但是用活潑的演出，其實我看著閣較可貴的是，一到臺灣就佮阮足濟間學校的同學，變成自動交流起來」

根據教育部統計，對2003年到2019年，臺灣到日本參訪的高中生佮老師有十萬人，日本來臺灣的甚至超過36萬人。雙方捷捷交流，背後功臣是臺灣國際教育旅行聯盟。

臺灣國際教育旅行聯盟2.0總會長 林香吟表示：「過去20年，其實臺灣是佇外交真困難的時代，去進行國際的交流。所以我會記得十幾年前頭一擺佇學校內底，推動這个國際教育旅行的時陣，彼時陣欲揣一个交流的學校，其實是足困難的」

林香吟講，2020年2.0成立了後，產官學三方合作成立一个平台，透過駐外人員協助予學校閣較方便揣著適合的交流對象，交流的品質嘛會當提升。

林香吟表示：「阮這馬佇咧2.0，阮佇所有的縣市，攏有設立一个國際教育資源中心，叫做IERC，協助in以後佇解封了後，按怎正式去推動這个國際教育旅行」

目前聯盟主要合作的對象是日本，另外嘛有韓國、東南亞國家等等的學校。佇咧疫情時代，聯盟嘛推出各種線頂交流活動，望囡仔會當成做世界的公民。